കെ.എ. ജോര്‍ജുകുട്ടി  [About Author]   നര്‍മ്മം പ്ലേറ്റോയും കന്നുകാലി ശല്യവും
Email Print Published: 2/8/2010 Write Comments

പൊതുനിരത്തുകള്‍ അലഞ്ഞുതിരിയുന്ന കന്നുകാലികളും മറ്റു വളര്‍ത്തുമൃഗങ്ങളുമായി "പങ്കുവയ്ക്കാന്‍" വിധിക്കപ്പെട്ടവരാണ് ഇന്‍ഡ്യന്‍ പൗരന്മാരെല്ലാവരും. ഉത്തരേന്ത്യന്‍ നഗരങ്ങളിലാണ് ഈ "പങ്കുവയ്ക്കല്‍" ഏറ്റവും സുന്ദരമായി നടക്കുന്നത്. ഇതില്‍ നിന്നുളവാകുന്ന മന:പീഡ മാറാന്‍ യവന ചിന്തകനായ പ്ലേറ്റോയുടെ "റിപ്പബ്ലിക്" വായിക്കുകയേ വേണ്ടൂ എന്ന് കുറേക്കാലം മുന്‍പ് ഞാന്‍ കണ്ടുപിടിച്ചു. കഥയിങ്ങനെ:-

തലസ്ഥാനനഗരിയില്‍ രോഹിണി എന്ന സ്ഥലത്തെ (അ)ശുദ്ധവായുവാണ് അക്കാലത്തെ ഈയുള്ളവന്‍ ശ്വസിച്ചിരുന്നത്. പങ്കുവയ്ക്കലിന്റെ നീതിശാസ്ത്രം കര്‍ശനമായി നടപ്പായിരിക്കുന്ന സ്ഥലമാണത്. ഇരുകാലി മൃഗങ്ങളായ നമുക്ക് മറ്റു സസ്തനികളിമായി തോളുരുമ്മിയല്ലാതെ വഴിനടക്കാന്‍ ഒരു വഴിയുമില്ലാത്ത സ്ഥലം. പശുക്കളും എരുമകളും എല്ലായിടത്തുമുണ്ട്. അവ നിങ്ങള്‍ക്ക് വഴി മാറിത്തരുകയില്ല. മാറിക്കൊടുക്കേണ്ടത് നിങ്ങളുടെ ജോലി. "മോണിങ്ങ് വാക്കിന്" ഇറങ്ങിയാല്‍ ഒരു ഡസന്‍ ശ്വാനന്മാരെങ്കിലും നിങ്ങള്‍ക്കൊപ്പമുണ്ടാകും. സുഹൃദ്ഭാവത്തിലാണ് വരവ്. ആ സൗഹൃദത്തെ തിരസ്കരിക്കാനുള്ള പൊങ്ങച്ചം നിങ്ങള്‍ക്കുണ്ടെങ്കില്‍ അവ നിങ്ങളെ നല്ല പാഠം പഠിപ്പിക്കും.


ഇതൊന്നും സഹിക്കാനാവാതെ ഞാന്‍ വലയുമ്പോഴാണ് "റിപ്പബ്ലിക്" വായിക്കാനിടയായത്. പണ്ട് രാഷ്ട്രമീമാംസയില്‍ ബിരുദാനന്തര ബിരുദത്തിന് പഠിക്കുമ്പോള്‍ വാങ്ങിയതാണ്. അന്ന് പുസ്തകം വായിക്കാതെ തന്നെ കടമ്പ കടന്നു. സഹായത്തിന് പ്ലേറ്റോയേക്കാല്‍ പ്രഗത്ഭരായവര്‍ എഴുതിയുണ്ടാക്കിയ ഗൈഡ് ഉണ്ടായിരുന്നു. എന്നാല്‍ ഈ പുതിയ മന:ക്ലേശത്തിന് ഗൈഡില്‍ വായിച്ചതൊന്നും ഓര്‍ത്തു നോക്കിയിട്ട് ശമനമുണ്ടാകാഞ്ഞപ്പോള്‍ ഗ്രന്ഥം തന്നെ കയ്യിലെടുത്തു. കമ്മ്യൂണിസത്തിന്റെ കാര്യത്തില്‍ കാറല്‍ മാക്സിനേയും നമ്പൂതിരിപ്പാടിനേയും അച്ചുതാനന്ദനേയും എല്ലാം കടത്തിവെട്ടിയ ഭയങ്കരനാണ് പ്ലേറ്റോ എന്ന് ഗൈഡ് എനിക്ക് നേരത്തെ പറഞ്ഞുതന്നിരുന്നു. ചട്ടിയുടേയും കലത്തിന്റേയും വസ്തുവകകളുടേയും മാത്രം പൊതു ഉടമസ്ഥത കൊണ്ടു തൃപ്തിപ്പെടാതെ, ഭാര്യമാരും മക്കളും കൂടി പൊതുമുതലായെങ്കിലേ സംതൃപ്തസമൂഹം നിലവില്‍ വരുകയുള്ളു എന്നു വാദിച്ച വീരനായിരുന്നു അദ്ദേഹം.


അതൊക്കെ ഓടിച്ചു വായിച്ചിട്ട്, സംതൃപ്തരാഷ്ട്രം അധ:പതിക്കുമ്പോള്‍ ഉണ്ടാകുന്ന അസംതൃപ്തരാഷ്ട്രങ്ങളെക്കുറിച്ച് പ്ലേറ്റോ എഴുതിയത് ഞാന്‍ വായിച്ചു. അധ:പതനത്തിന്റെ ആദ്യഘട്ടത്തിലുണ്ടാകുന്നത് സമ്പന്നര്‍ നയിക്കുന്ന ഭരണകൂടമാണ്. അതിനെ തുടര്‍ന്ന് സമൂഹത്തിലെ "വെണ്ണപ്പാളി"-യില്‍ ഉള്ളവരെല്ലാം ചേര്‍ന്നുള്ള ഭരണം. പിന്നെയാണ് നമുക്ക് പ്രിയപ്പെട്ട ജനാധിപത്യം വരുന്നത്. അതിനെക്കുറിച്ച് പ്ലേറ്റോ പലതും പറയുന്നുണ്ടെങ്കിലും ജനാധിപത്യരാഷ്ട്രത്തില്‍ മൃഗങ്ങള്‍ക്കുള്ള സ്ഥാനത്തെക്കുറിച്ച് പറഞ്ഞതാണ് എന്നെ ആകര്‍ഷിച്ചത്. ഞാനത് വീണ്ടും വായിച്ചു:

"ജനാധിപത്യത്തിന്‍ കീഴില്‍ വളര്‍ത്തുമൃഗങ്ങള്‍ അനുഭവിക്കുന്ന സ്വാതന്ത്ര്യം നിങ്ങള്‍ കണ്ടുതന്നെ അറിയണം. ശ്വാനന്‍ അവന്റെ യജമാനത്തിക്ക് ഒപ്പം നിലയും വിലയും കൈവരിക്കുന്നു. കുതിരയുടേയും കഴുതയുടേയും അവസ്ഥയും അതു തന്നെ. സര്‍വത്ര സ്വാതന്ത്ര്യത്തോടെ അവ തെരുവീഥികളില്‍ വിഹരിക്കുകയും വഴിമാറിക്കൊടുക്കാത്തവരെ ഇടിച്ചുവീഴ്ത്തുകയും ചെയ്യുന്നു. സ്വാതന്ത്ര്യബോധം എല്ലായിടത്തും നിറഞ്ഞുനില്‍ക്കുന്നു".


ഹാവൂ, എനിക്ക് ആശ്വാസമായി. ഞാന്‍ ജീവിക്കുന്നത് അസംതൃപ്ത സമൂഹത്തിലായിരിക്കാം. എന്നാലും അത് പൂര്‍ണ്ണതയെത്തിയ ജനാധിപത്യമാണെന്നത് ആര്‍ക്കാണ് നിഷേധിക്കാന്‍ കഴിയുക? ലക്ഷണമൊത്ത ഒരു ജനാധിപത്യരാഷ്ട്രത്തില്‍ ജീവിക്കാന്‍ അവസരം കിട്ടിയതില്‍ എനിക്ക് ആദ്യമായി സന്തോഷം തോന്നി.

വാല്‍‍ക്കഷ്ണം:-

പുസ്തകത്തിന്റെ ബാക്കിഭാഗം വായിച്ചപ്പോള്‍ എന്റെ സന്തോഷത്തിന് അല്പം മങ്ങലേറ്റു എന്നു പറയാതെ വയ്യ. പൂര്‍ണ്ണതയെത്തിയ ജനാധിപത്യം അടുത്ത ഘട്ടത്തില്‍ ഭീകരവാഴ്ചയായി അധപതിക്കുമെന്നാണ് പ്ലേറ്റോ തുടര്‍ന്നു പറയുന്നത്. ഭീകരവാഴ്ചയില്‍ വളര്‍ത്തുമൃഗങ്ങളുടെ നിലയെന്തായിരിക്കുമെന്ന് അദ്ദേഹം പറഞ്ഞിട്ടില്ല.

1


ഈ രചനയെക്കുറിച്ച്‌ നിങ്ങളുടെ അഭിപ്രായം എഴുതുക

pleatoyum, kannukali, shalyavum, narmam, by K A Georgekutty